Ab Kis Ka Jashan Manatey Ho…

0
387

Ab Kis Ka Jashan Manatey Ho
Us Dais Ka Jo Taqseem Hua
Ab Kis Ke Geet Sunaatey Ho
Us Tan Man Ka Jo Do Nim Hua…

Us Khwaab Ka Jo Reza Reza
Un Aankhon Ki Taqdeer Hua
Us Naam Ka Jo Tukrey Tukrey
Galiyon Me Be Tauqir Hua…

Us Jang Ka Jo Tum Haar Chukey
Us Rasm Ka Jo Jaari Bhi Nahi
Us Zakhm Ka Jo Seeney Pe Na Tha
Us Jaan Ka Jo Waari Bhi Nahi

Us Khoon Ka Jo Bad Qismat Tha
Raahon Mei Bahaya Tan Mei Raha
Us Phool Ka Jo Be Qeemat Tha
Aangan Mei Khilaya Ban Mei Raha

Us Mashriq Ka Jis Ka Tum Ne
Neze Ki Ani Marham Samjha
Us Maghrib Ka Jis Ko Tum Ne
Jitna Bhi Loota Kum Samjha

Un Maasoomon Ka Jin Ke Lahu
Se Tum Ne Farozaan Raaten Ki
Ya Un Mazloomo Ka Jin Se
Khanjar Ki Zabaan Mei Baaten Ki

Un Noha Garon Ka Jin Ne Humen
Khud Qatal Kia Khud Rotey Han
Aisey Bhi Kahin Dum Saaz Huye
Aisey Jallad Bhi  Hotey Han

Un Bhookey Nange Dhaanchon Ka
Jo Raqs Karen Bazaaron Mei
Ya Un Zaalim Qazzaqon Ka
Jo Bhes Badal Kr Waar Karen

Ya Un Jhootey Iqraaron Ka
Jo Aaj Talak Eefa Na Huye
Ya Un Bebas Lachaaron Ka
Jo Aur Bhi Dukh Ka Nishana Huye

Is Shahi Ka Jo Dast Badast
Aai Hai Tumharey Hisse Mei
Kiu Nang Watan Ki Baat Karo
Kia Rakha Hai Is Qissey Mei

Aankhon Mei Chhupaae Ashkon Ko
Hontoon Peh Wafaa Kay Bol Liye
Iss Jashan Mei Mai Bhi Shaamil Hoon
Nohon Se Bharaa Kashkol Liye…

 

Picked from Ahmed Faraz Collection

 

LEAVE A REPLY

Please enter your comment!
Please enter your name here

:bye: 
:good: 
:negative: 
:scratch: 
:wacko: 
:yahoo: 
B-) 
:heart: 
:rose: 
:-) 
:whistle: 
:yes: 
:cry: 
:mail: 
:-( 
:unsure: 
;-)